ក្តីកង្វល់ និងបញ្ហារបស់សហគមន៍ទាំង៨ ក្នុងស្រុកមង្គលបូរី ត្រូវបានលើកយកមកដាក់លើតុ ឲ្យអាជ្ញាធរស្រុកបានដឹង បានឮ ក្នុងការចូលរួមដោះស្រាយ

 

(បន្ទាយមានជ័យ) ដើម្បីស្វែងរកដំណោះស្រាយជូនប្រជាពលរដ្ឋ ពីកង្វល់ និងបញ្ហាក្នុងសហគមន៍ អង្គការវិទ្យាស្ថានតស៊ូមតិ និងគោលយោបាយ(API)សាខាខេត្តបន្ទាយមានជ័យ ដឹកនាំដោយលោក អ៊ុច គ្រីស្តា តំណាងអង្គការ (API) បានរៀបចំបើកកិច្ចប្រជុំពិភាក្សាពីកង្វល់ និងបញ្ហាក្នុងសហគមន៍ និងស្វែងរកដំណោះស្រាយជូនប្រជាពលរដ្ឋ និងផ្សព្វផ្សាយបច្ចេកវិទ្យាតាមរយៈក្តារព័ត៌មានផេក(ពិដោរ អ្នកភូមិឆ្លាតវៃ) ក្នុងស្រុកមង្គលបូរី ពិធីនេះប្រព្រឹត្តទៅក្រោមវត្តមានលោក កែវ តុម ប្រធានក្រុមប្រឹក្សាស្រុក និងលោក មិន និមល អភិបាលរងស្រុកមង្គលបូរី ដោយមានការចូលរួមពីលោក លោកស្រី អធិការ អធិការរងស្រុក នាយប៉ុស្តិ៍ឃុំ ប្រធានការិយាល័យជុំវិញស្រុក មេឃុំ និងក្រុមសហគមន៍ចំនួន៨ នារសៀលថ្ងៃទី២០ ខែសីហា ឆ្នាំ២០២៤ ធ្វើនៅសាលប្រជុំសាលាស្រុកមង្គលបូរី។

លោក អ៊ុច គ្រីស្តា តំណាងអង្គការ (API) បានឡើងមានមតិលើកឡើងថា៖ កិច្ចប្រជុំពិភាក្សានាពេលនេះមានគោលបំណង៖១,កំណត់បាននៅបញ្ហាផ្សេងៗដែលបានកើតឡើងនៅតាមសហគមន៍មូលដ្ឋាន។២,ធ្វើផែនការនិងដោះស្រាយ និងឆ្លើយតបជាវិជ្ជមានទៅនឹងបញ្ហារបស់ប្រជាពលរដ្ឋនៅមូលដ្ឋាន ដោយផ្ទាល់នៅសហគមន៍។៣,បង្ហាញលើផ្ទាំងគ្រប់គ្រង(Dashboard)នៃការចូលប្រើប្រាស់ឧបករណ៍បច្ចេកវិទ្យាតាមរយៈក្តារព័ត៌មានពិដោរ អ្នកភូមិឆ្លាតវៃ។

ជាមួយគ្នានោះលោក អ៊ុច គ្រីស្តា បានបញ្ជាក់ថា៖ អង្គការវិទ្យាស្ថានតស៊ូមតិនិងគោលនយោបាយ(API) បានខិតខំប្រឹងប្រែងអោយសម្រេចគោលបំណងពង្រឹងការចូលរួមរបស់ប្រជាពលរដ្ឋ ជាពិសេសស្ត្រី យុវជន ជនជាតិដើមភាគតិច និងជនមានពិការភាព នៅក្នុងអភិបាលកិច្ចមូលដ្ឋាន ដើម្បីលើកកម្ពស់តម្លាភាព ការទទួលបានព័ត៌មាន ស្ដីពីសេវាច្រកចេញចូលតែមួយ សាធារណៈនិងពិភាក្សាស្វែងយល់ពីបញ្ហា និងដំណោះស្រាយជូនប្រជាពលរដ្ឋក្នុងសហគមន៍។ ជាពិសេស ក្នុងការចូលរួមយល់ដឹង នឹងចេះប្រើប្រាស់ឧបករណ៍បច្ចេកវិទ្យាតាមរយៈក្តារព័ត៌មាន ផេក(ពិដោរអ្នកភូមិឆ្លាតវៃ) ដោយផ្តោតសំខាន់ទៅលើ ១.ការផ្ដល់ព័ត៌មាន ២.ការតាមដានសំបុត្រ ៣.ការផ្តល់មតិយោបល់...។

មានមតិក្នុងឱកាសនោះលោក មិន និមល អភិបាលរងស្រុកមង្គលបូរី ក៏បានកោតសរសើរ និងវាយតម្លៃខ្ពស់ចំពោះអង្គការវិទ្យាស្ថានតស៊ូមតិ និងគោលយោបាយ(API) ដែលបានខិតខំប្រឹងប្រែងដោះស្រាយពីកង្វល់ និងបញ្ហាក្នុងសហគមន៍ និងស្វែងរកដំណោះស្រាយជូនប្រជាពលរដ្ឋ ពោល(រិះគុណ ដើម្បីស្ថាបនា)។

លោក មិន និមល បានធ្វើការគាំទ្រគោលនយោបាយរបស់អង្គការ (API) និងចូលរួមសហការណ៍ជាមួយសហគមន៍ទាំងអស់ នៅក្នុងមូលដ្ឋានរបស់ខ្លួន ក្នុងការអនុវត្តរាល់ការលំបាក និងបញ្ហាប្រឈមនានាដែលកើតមានឡើង ក្នុងការរួមគ្នាដោះស្រាយ។ជាពិសេសក្នុងការផ្តល់សេវាសាធារណ:ជូនពលរដ្ឋក្នុងភូមិសាស្ត្រក្នុងសហគមន៍ឲ្យបានទាន់ពេលវេលា។

លោក កែវ តុម ប្រធានក្រុមប្រឹក្សាស្រុក បានធ្វើការសំណូមពរជូនដល់អស់លោក លោកស្រីប្រធានសហគមន៍ទាំងអស់ចូលរួមអនុវត្តឲ្យបានគ្រប់ៗគ្នា និងផ្សព្វផ្សាយបច្ចេកវិទ្យាតាមរយៈក្តារព័ត៌មានផេក(ពិដោរ អ្នកភូមិឆ្លាតវៃ)ទៅដល់ស្រទាបមហាជនឲ្យបានផលផុសនៅថែមមូលដ្ឋាន។

ក្នុងឱកាសនោះលោក ប្រធានក្រុមប្រឹក្សាស្រុក លោកអភិបាលរងស្រុក កងកម្លាំងនគរបាលមានសមត្ថកិច្ច អាជ្ញាធរមូលដ្ឋាន និងមន្រ្តីគម្រោងបានឆ្លើយតប និងគាំទ្រយ៉ាងពេញទំហឹងលើបញ្ហាដែលបានលើកឡើង និងបានធ្វើការបកស្រាយភ្លាមៗជូនដល់ពួកគាត់ផងដែរ និងបញ្ហាដែលនៅសេសសល់នឹងរកវិធីដោះស្រាយជូនសហគមន៍ឲ្យទាល់តែបាន៕