រដ្ឋបាលខេត្តកំពង់ចាម ឆ្លើយតបចំពោះករណីចាក់ដីចូលទន្លេ នៅឃុំមានជ័យ ស្រុកស្រីសន្ធរធ្វើអោយប្រជាពលរដ្ឋភ្ញាក់ខ្លួនព្រើតវគ្គ១

 

ខេត្តកំពង់ចាម ៖ បន្ទាប់ពីប្រព័ន្ធផ្សព្វផ្សាយ ចុះផ្សាយជា បន្តបន្ទាប់ករណីចាក់ដីចូលទន្លេមេគង្គថ្មីមួយទៀត នៅស្រុកស្រីសន្ធរនោះ រដ្ឋបាលខេត្តកំពង់ចាម មានកិត្តិយសសូមជម្រាបជូនសាធារណៈជន និងអ្នកសារព័ត៌ មានមេត្តាជ្រាបថា បន្ទាប់ពីទទួលបានព័ត៌មានពីករណីចាក់ថ្មច្រាំងទន្លេ នៅទីតាំងភូមិជ័យ ឃុំមានជ័យ ស្រុកស្រីសន្ធរខេត្តកំពង់ចាមនៅរសៀលថ្ងៃទី២៩ខែមេសា ឆ្នាំ ២០២៤ រដ្ឋបាលខេត្តបានចាត់តាំង លោក ស្រី សុភ័ក្ត្រ អភិបាលរង នៃគណៈអភិបាលខេត្តកំពង់ចាម ដឹកនាំក្រុមការងារចម្រុះចុះពិនិត្យ និងវាយតម្លៃសំណង់ ព្រម ទាំងជួបជាមួយ នឹងភាគីពាក់ព័ន្ធរួមមាន អាជ្ញាធរឃុំ/ភូមិ តំណាងម្ចាស់ទីតាំង និងប្រជាពលរដ្ឋរស់នៅក្បែរតំបន់នៃសំណង់។ រដ្ឋបាលខេត្តសូមប្រកាសអំពីលទ្ធ ផល និងវិធានការរដ្ឋបាល ដែលមានដូចខាងក្រោម៖

១-ការចាក់ថ្មច្រាំងទន្លេនេះ មានប្រវែងបណ្តោយច្រាំង ១៦៥ម៉ែត្រ ជម្រាលច្រាំង ១០ម៉ែត្រ និង ១៦ម៉ែត្រ ដែលផ្នែកខាងក្រោមចាក់ថ្មទប់ជម្រាលលយចូលក្នុងទឹកសំណង់នេះ ធ្វើឡើងពុំបានសុំច្បាប់ជាលាយលក្ខណ៍ អក្សរទេតែបានសុំផ្ទាល់មាត់ត្រឹមលោកមេឃុំមានជ័យ សំណង់ត្រូវបានចាប់ផ្តើមម្តងបន្តិចៗ រហូតដល់ចប់ សកម្មភាពទាំងស្រុងនៅក្នុងខែមករា ឆ្នាំ២០២៤ កន្លង ទៅ។ ម្ចាស់ទីតាំងបានបញ្ជាក់ពីគោលបំណងនៃការចាក់ថ្មនេះគឺដើម្បីការពារទប់ច្រាំងទន្លេកុំឲ្យបាក់បន្តទៀត។

២-ជាវិធានការរដ្ឋបាល គឺក្រុមការងារបានតម្រូវឲ្យម្ចាស់ទីតាំងបញ្ឈប់សកម្មភាពចាក់ថ្មបន្តទៀត និងរង់ចាំ លទ្ធផលនៃការចុះសិក្សា វាយតម្លៃរបស់ក្រសួងធនធានទឹកនិងឧតុនិយម អំពីលក្ខណៈបច្ចេកទេស និងផលប៉ះពាល់ប្រសិនបើមាន។

៣-ជាការវាយតម្លៃបឋម ក្រុមការងារចម្រុះរបស់រដ្ឋបាលខេត្តយល់ឃើញថា សំណង់នេះហាក់មិននាំទៅ ដល់ការ ខូចខាតច្រាំងទន្លេឬធ្វើឲ្យប៉ះពាល់លំហូរទឹកទន្លេឡើយផ្ទុយមកវិញ សំណង់នេះ ទំនងជាអាចជួយទប់ ច្រាំងទន្លេមិនឲ្យបាក់បន្ត។ 

មិនតែប៉ុណ្ណោះ ប្រជាជនដែល មានផ្ទះនៅក្បែរសំណង់ទាំងអស់ គឺមានការសារទរទាំងអស់គ្នា ដ្បិតពួកគាត់យល់ឃើញថា សំណង់នេះនឹងជួយការពារច្រាំងទន្លេមិនឲ្យបាក់មកដល់ផ្ទះពួកគាត់ដែរ។

៤-រដ្ឋបាលខេត្តក៏សូមបញ្ជាក់ផងដែរថា ដើម្បីការពារផ្លូវជាតិលេខ ៧០B ដែលគម្រាមកំហែងដោយការ បាក់ច្រាំងជាបន្តបន្ទាប់ជាច្រើនឆ្នាំមកនេះ រដ្ឋបាលខេត្តក៏មានគម្រោងជួសជុលច្រាំងទន្លេនៅតំបន់នោះកុំឲ្យបាក់ស្រុត បន្តនៅពេលឆាប់ៗខាងមុខដែរ។ ជាមួយគ្នានោះ រដ្ឋបាលខេត្តកំពង់ចាមសូមស្វាគមន៍ចំពោះសប្បុរសជនទាំងអស់ ដែលមានបំណងចង់ចូលរួមអភិវឌ្ឍមូលដ្ឋាន ពិសេសសំណងច្រាំងទន្លេ តែសូមឲ្យមានកិច្ចសហការពីអជ្ញាធរ និង ស្ថាប័នជំនាញជាមុន ដើម្បីចូលរួមគាំទ្រផ្នែកច្បាប់ បច្ចេកទេស និងធានានូវតម្លៃនៃសមិទ្ធផល។

អាស្រ័យដូចបានជម្រាបជូនខាងលើ សូមសាធារណជន និងអ្នកសារព័ត៌មានមេត្តាជ្រាប និងសូមមេត្តា បញ្ឈប់ការផ្សព្វផ្សាយព័ត៌មាននេះ ដើម្បីរង់ចាំលទ្ធផលនៃការចុះសិក្សានិងវាយតម្លៃពីក្រសួងជំនាញ។ អាស្រ័យហេតុនេះ សូមសាធារណៈជន និងអ្នកសារព័ត៌មាន មេត្តាជ្រាប ។

បើយោងតាមការឆ្លើយតបរបស់រដ្ឋបាលខេត្តកំពង់ចាមអង្គភាពអ្នកសារព័ត៌មានយើងក៏ដូចជាប្រជាពលរដ្ឋទូទាំងប្រទេសនៅមានចម្ងល់ចង់សួរទៅរដ្ឋបាលខេត្តកំពង់ចាមដោយក្តីអនុគ្រោះ។

តើការងារចាក់ថ្មទប់ច្រាងទន្លេគឺជាកាតព្វកិច្ចរបស់ប្រជាពលរដ្ឋឬជាកាតព្វកិច្ចរបស់រដ្ឋបាលខេត្ត។

ក្នុងនាមជាអភិបាលនៃគណៈអភិបាលខេត្តជាគណៈមេបញ្ជាការឯកភាពគ្រប់គ្រងសម្បត្តិរដ្ឋតើមានកាតព្វកិច្ចធ្វើអ្វីខ្លះ? ការគ្រប់គ្រងដោយមិនមានការទទួលខុសត្រូវ ក្នុងនាមជាមន្ត្រីគួរតែអនុវត្តច្បាប់អោយបានតឹងរឹង ដោយឡែកទង្វើចាក់ថ្មរំលោភដីច្រាំងទន្លេ រំលាភបំពានសម្បត្តិរបស់រដ្ឋ តើរដ្ឋបាលខេត្តកំពង់ចាមចាត់វិធានការយ៉ាងណាវិញចំពោះបុគ្គលទាំងនោះ?

អង្គភាពអ្នកសារព័ត៌មានយើងសង្ឃឹមថារដ្ឋបាលខេត្តកំពង់ចាមនិងយកចិត្តទុកដាក់អនុវត្តតាមច្បាប់និងចាប់ជនបង្កមកដល់ទៀតទោសតាមមតិវិធីច្បាប់។

អង្គភាពអ្នកសារព័ត៌មានយើងគ្រាន់តែជាកញ្ចក់ឆ្លុះបញ្ចាំងរិះគន់ក្នុងន័យស្ថាបនានិងសូមរង់ចាំការឆ្លើយបំភ្លឺគ្រប់ស្ថាប័នពាក់ព័ន្ធគ្រប់ពេលម៉ោងធ្វើការតាមរបបអ្នកសារព័ត៌មានសូមអរគុណ។