ឯកឧត្តមបណ្ឌិត ប៉ាន់ខែម ប៊ុនថន ដឹកនាំកិច្ចប្រជុំជាមួយបញ្ជាការឯកភាពក្រុងប៉ោយប៉ែត អំពីការពង្រឹងសន្តិសុខសណ្តាប់ធ្នាប់ និងការបង្រ្កាបទប់ស្កាត់ក្មេងទំនេីង ក្នុងក្រុងប៉ោយប៉ែត

 

(បន្ទាយមានជ័យ) ដេីម្បីផ្តល់ភាពកក់ក្តៅដល់ប្រជាពលរដ្ឋ និងលេីកកម្ពស់ការអនុវត្តគោលនយោបាយភូមិ ឃុំមានសុវត្ថិភាព សម្រាប់មូលដ្ឋានក្រុងប៉ោយប៉ែតឯកឧត្តមបណ្ឌិត ប៉ាន់ខែម ប៊ុនថន ប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត បានដឹកនាំកិច្ចប្រជុំជាមួយបញ្ជាការឯកភាពក្រុងប៉ោយប៉ែត អំពីការពង្រឹងប្រព័ន្ធការពារសន្តិសុខ សណ្តាប់ធ្នាប់ ការបង្រ្កាបទប់ស្កាត់ក្មេងទំនេីង និងការបង្ក្រាបបទល្មេីសនានា ក្នុងក្រុងប៉ោយប៉ែត ព្រឹកថ្ងៃពុធ ទី១៣ ខែមីនា ឆ្នាំ២០២៤ កិច្ចប្រជុំនេះធ្វើនៅសាលប្រជុំក្រុងប៉ោយប៉ែត។

 

ថ្លែងនៅក្នុងឱកាសនោះឯកឧត្តមបណ្ឌិត ប៉ាន់ខែម ប៊ុនថន ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត បានថ្លែងកោតសរសេីរចំពោះបញ្ជាការឯកភាព និងសម្ថកិច្ចក្រុងប៉ោយប៉ែត ដែលបានយកចិត្តទុកដាក់ខ្ពស់ និងបានសហការគ្នាយ៉ាងល្អ ក្នុងការអនុវត្តការងារស្នូល និងការងារអន្តរាគមន៍នានា ពិសេសការងារបង្ក្រាបក្រុមក្មេងទំនេីង និងបទល្មេីសផ្សេងៗយ៉ាងមានប្រសិទ្ធភាពនាពេលកន្លងមក។

ឯកឧត្តម ប្រធានក្រុមការងារ បានស្នេីឱ្យបញ្ជាការឯកភាព និងកងកម្លាំងសមត្ថកិច្ចក្រុងប៉ោយប៉ែត ត្រូវបន្តទទួលខុសត្រូវលេីការងារការពារសន្តិសុខសង្គមនេះឱ្យបានល្អប្រសេីរ គ្រប់ពេល ដេីម្បីប្រជាពលរដ្ឋមូលដ្ឋានក្រុងប៉ោយប៉ែតយេីងមានសេចក្តីសុខសុវត្ថិភាព សប្បាយរីករាយ និងមានឱកាសប្រកបរបរចិញ្ចឹមជីវិតប្រកបដោយភាពកក់ក្តៅ និងស្នាមញញឹមគ្រប់ពេល "យេីងទាំងអស់គ្នារួមគ្នាធ្វេីការងារដេីម្បីប្រជាពលរដ្ឋក្រុងប៉ោយប៉ែត ព្រោះប្រជាពលរដ្ឋក្រុងប៉ោយប៉ែតគឺជាគ្រួសាររបស់យេីងទាំងអស់គ្នា"៕