ចាប់ខ្លួនជនជាតិវៀតណាម២នាក់ពាក់ព័ន្ធករណីលួចនាំថ្នាំញៀន២០គីឡូក្រាមចូលមកកម្ពុជា
ភ្នំពេញ៖ មន្ទីរប្រឆាំងបទល្មើសគ្រឿងញៀន បានចាប់ខ្លួនជនជាតិវៀតណាមចំនួន២នាក់ ពាក់ព័ន្ធករណីជួញដូរគ្រឿងញៀនឆ្លងដែន ដោយជនសង្ស័យទាំងពីរនាក់ បានលួចនាំចូលថ្នាំញៀនប្រមាណ២០គីឡូក្រាមពីប្រទេសឡាវចូលមកកាន់កម្ពុជា។ ការឃាត់ខ្លួនជនសង្ស័យទាំងពីរនាក់ ធ្វើឡើងនៅចំណុចមុខសណ្ឋាគារ The Palm Bay Resort ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ។
ការចុះបង្ក្រាបនេះ ដោយកម្លាំងជំនាញ (ក៥) នៃមន្ទីរប្រឆាំងគ្រឿងញៀន សហការជាមួយកម្លាំង នៃស្នងការដ្ឋាននគរបាលខេត្តព្រះសីហនុ ដឹកនាំសម្របសម្រួលលោក ពេញ ពិសិដ្ឋ ព្រះរាជអាជ្ញារង នៃអយ្យការអមសាលាដំបូង ខេត្តព្រះសីហនុ នៅថ្ងៃទី២៤ ខែធ្នូ ឆ្នាំ២០២៣ វេលាម៉ោង ២០៖៣០នាទី។ជនសង្ស័យជាជនជាតិវៀតណាមទាំង២នាក់រួមមាន៖ ទី១.ឈ្មោះ LO TUAN HANH ឬ TRAN TUAN THANH ភេទប្រុស ជនជាតិវៀតណាម កើត ២៦/១០/១៩៦០ កាន់លិខិតឆ្លងដែនលេខ C5968845 និងឈ្មោះ CHUNG DUONE ភេទប្រុស ជនជាតិវៀតណាម កើត ២៤/១២/១៩៨០ កាន់លិខិតឆ្លងដែនលេខ C8603967។ ចាប់យកវត្ថុតាង៖ សារធាតុញៀនហេរ៉ូអ៊ិន (HEROIN) ៦០ដុំ ស្មើទម្ងន់ ២០គីឡូក្រាម។បច្ចុប្បន្ន ជនសង្ស័យ និងវត្ថុតាងចាប់យកខាងលើ បានកសាងសំណុំរឿង បញ្ជូនទៅសាលាដំបូងខេត្តព្រះសីហនុតាមនីតិវិធី៕
Post a Comment