អគ្គិភ័យលេបត្របាក់ តូបអាជីវករអស់ចំនួន ៤១៩តូប ក្នុងផ្សារបុរីសន្តិភាព២ ខណ្ឌពោធិ៍សែនជ័យ
រាជធានីភ្នំពេញ ៖ គិតត្រឹមរសៀលថ្ងៃទី២៨ ខែវិច្ឆិកា ឆ្នាំ២០២៣នេះ តូបលក់ដូរជាង៤១៩តូបនៅក្នុងផ្សារបុរីសន្តិភាព២ រួមជាមួយទំនិញ និងសម្ភារៈទាំងអស់នៅក្នុងតូបទាំងនោះ ត្រូវបានអណ្ដាតភ្លើងឆាបឆេះអស់ទាំងស្រុងក្នុងថ្ងៃបុណ្យអុំទូកទី៣ ខណៈពេលដែលម្ចាស់តូបកំពុងដេកលង់លក់នៅតាមផ្ទះរៀងៗខ្លួន ហើយការឆាបឆេះនោះ ត្រូវបានសមត្ថកិច្ចរកឃើញថា បណ្ដាលមកពីឆ្លងចរន្តអគ្គិសនី។
ហេតុការណ៍នោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង១និង១០នាទីយប់រំលងអធ្រាត្រឈានចូលថ្ងៃទី២៨ ខែវិច្ឆិកា ឆ្នាំ២០២៣ នៅក្នុងផ្សារបុរីសន្តិភាព២ ស្ថិតក្នុងភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មាន បានប្រាប់ឲ្យដឹងថា តូបលក់ដូរដែលរងការបំផ្លាញដោយសារគ្រោះអគ្គិភ័យនោះ មានចំនួន៤១៩តូប ស្ថិតនៅក្នុងអគារទំហំ៣២ម៉ែត្រX១០០ម៉ែត្រ សាងសង់អំពីដែកប្រក់ស័ង្កសី។ ដោយឡែកម្ចាស់ទីតាំងមានឈ្មោះ ស្រី ចាន់ថាត ភេទប្រុស អាយុ៣៨ឆ្នាំ ជាជនជាតិខ្មែរ។
ប្រភពដដែលបន្តថា នៅពេលមុនកើតហេតុ ភ្លើងបានចាប់ផ្ដើមឆាបឆេះដំបូងចេញពីតូបនៅកណ្ដាលផ្សារតែម្ដង រួចទើបបន្តឆេះរាលដាលទៅដល់តូបខាងៗជាបន្តបន្ទាប់យ៉ាងសន្ធោសន្ធៅ។ ហើយខណៈពេលភ្លើងចាប់ផ្ដើមឆាបឆេះតិចនោះ គឺពុំមាននរណាម្នាក់បានដឹងភ្លាមៗនោះទេ ព្រោះពេលនោះពុំមានអ្នកលក់ដូរឡើយ តូបទាំងអស់ត្រូវបានបិទទ្វារ ហើយម្ចាស់តូបនីមួយៗក៏ទៅដេកនៅផ្ទះរៀងៗខ្លួនអស់ទៅហើយ។
ប្រភពដដែលបានឲ្យដឹងបន្តទៀតថា ចំណែកក្រុមពន្លត់អគ្គិភ័យបានធ្វើការពន្លត់ភ្លើងតាំងពីពេលឆេះ រហូតដល់វេលាម៉ោងជាង៨ព្រឹកថ្ងៃដដែល ទើបអណ្ដាតភ្លើងរលត់ទៅវិញទាំងស្រុង ដោយប្រើប្រាស់ទឹកអស់ចំនួន២៦១រថយន្ត ស្មើនឹង១,០៥២ម៉ែត្រគូប ។
ពាក់ព័ន្ធក្នុងហេតុការណ៍គ្រោះអគ្គិភ័យខាងលើនេះ ពុំមានមនុស្សណាម្នាក់ស្លា.ប់ ឬរងរបួសឡើយ ដោយសារតែនៅពេលភ្លើងឆាបឆេះនោះ ពុំមានការលក់ដូរ ឬមានមនុស្សស្ថិតនៅទីតាំងកើតហេតុនោះឡើយ គឺតូបទាំងអស់ត្រូវបានបិទទ្វារទៅហើយ។
គួររំលឹកថា ៖ ថ្ងៃអុំទូកទី៣! អណ្ដាតភ្លើងឆាបឆេះបំផ្លាញជាង២០០តូប នៅក្នុងផ្សារបុរីសន្តិភាព២ ៕
Post a Comment