នាយករដ្ឋមន្ត្រីកម្ពុជាចេញសារកោតសរសើរ Kon Ant ដែលបាននាំយកព្រលឹងសិល្បៈដូនតាខ្មែរទៅបង្ហាញលើភ្នំទឹកកកខ្ពស់ជាងគេបំផុតរបស់ណូវែលហ្សេឡង់
សិល្បៈជាតិ៖ រូបភាពវីដេអូ Kon Ant រេរាំពត់ពែនគ្រងឈុតអប្សរាយ៉ាងស្រស់ស្អាត មិនត្រឹមទទួលបានការនិយមនិងសរសើរពីសាធារណជនទូទៅនោះឡើយ សូម្បីនាយករដ្ឋមន្ត្រីថ្មីរបស់កម្ពុជាគឺឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ក៏បានចេញសារកោតសរសើរចំពោះសកម្មភាពដ៏ប្រពៃដែលឆ្លុះបញ្ចាំងពីការខិតខំប្រឹងប្រែងផ្សព្វផ្សាយវប្បធម៌ដ៏ល្អផូរផង់របស់ខ្មែរមួយនេះផងដែរ។
![](https://troryorng.com/wp-content/uploads/2023/09/371862533_271845785647930_8046344376867137275_n-785x1024.jpg)
![](https://troryorng.com/wp-content/uploads/2023/09/photo_2023-09-02_10-22-18-638x1024.jpg)
នាព្រឹកថ្ងៃទី២ ខែកញ្ញា ឆ្នាំ២០២៣ ឯកឧត្តមកិត្តិទេសាភិបាលបណ្ឌិត បានបញ្ចេញសារខ្លីនៅលើបណ្ដាញសង្គម ដោយភ្ជាប់ជាមួយវីដេអូខាងលើនេះថា «សូមអរគុណ និងកោតសរសើរដល់ប្អូនៗ ដែលបាននាំយកព្រលឹងសិល្បៈដូនតាខ្មែរ ក្នុងឈុតអប្សរា មករាំបង្ហាញផ្សព្វផ្សាយពីអរិយធម៌ដ៏ស្រស់ត្រកាល និងរុងរឿងរបស់ខ្មែរ ដល់សាធារណជននៅទូទាំងពិភពលោកបានទស្សនា នៅភ្នំទឹកកកនៅប្រទេស New Zealand»។
កញ្ញា សុគា គីមលាង ហៅកូនអាន ដែលជានាដការីរបាំបុរាណ បានគ្រងឈុតអប្សរា និងរាំរបាំព្រះរាជទ្រព្យខ្មែរ (របាំអប្សរា) នៅលើភ្នំទឹកកកដែលមានឈ្មោះថា Mountcook របស់ប្រទេសណូវែលហ្សេឡង់។ ភ្នំទឹកកកនេះជាភ្នំដែលខ្ពស់ជាងគេបំផុតក្នុងប្រទេសមួយនេះ ដោយមានកម្ពស់ ៣៧២៤ម៉ែត្រ ឈរលើលេខរៀងទី៣៩ពិភពលោកក្នុងចំណោមភ្នំដែលមានកម្ពស់ខ្ពស់ៗបំផុត៕
Post a Comment