ឃាតកម្មសម្លាប់១គ្រួសារ៖ មន្រ្តីប៉ូលីសជាន់ខ្ពស់ថៃ ចុះមករួមបង្ក្រាបមេក្លោងឆបោកចិន ក្នុងក្រុងប៉ោយប៉ែត

ថៃ៖ អគ្គស្នងការរងនគរបាលជាតិថៃ ធ្វើដំណើរមកប្រទេសកម្ពុជា នៅថ្ងៃព្រហស្បត្តិ៍នេះ ដើម្បីសហការជាមួយអាជ្ញាធរខ្មែរ បង្ក្រាបមេក្លោងឆបោកជនជាតិចិន ក្នុងក្រុងប៉ោយប៉ែត។ មេក្លោងឆបោកជនជាតិចិនដែល ត្រូវបានគេជឿជាក់ថា ពាក់ព័ន្ធក្នុងករណីឃាតកម្មសម្លាប់ជនជាតិថៃមួយគ្រួសារ ក្នុងខេត្តសាមុត ប្រាកាន។

យោងតាមកាសែតបាងកកប៉ុស្តិ៍ នៅថ្ងៃទី៣០ខែសីហាម្សិលមិញ អគ្គស្នងការរងនគរបាលជាតិថៃ លោកនាយឧត្តមសេនីយ៍ សុរៈឆេត ហាក់ផាន ឬមានរហ័សនាមថា Big Joke នឹងចុះមកកម្ពុជាដោយផ្ទាល់នៅថ្ងៃព្រហស្បត្តិ៍នេះ ដើម្បីសហការជាមួយអាជ្ញាធរកម្ពុជា ក្នុងបេសកកម្ម តាមបង្ក្រាប មេក្លោងឆបោកជនជាតិចិន ក្នុងក្រុងប៉ោយប៉ែត ដែលជាប់ពាក់ព័ន្ធនឹងឃាតកម្មសម្លាប់ជនជាតិថៃមួយគ្រួសារក្នុងខេត្ត សាមុត ប្រាកាន។

ឃាតកម្មដ៏សោកសៅ បានកើតឡើងកាលពីថ្ងៃច័ន្ទ បង្កឡើងបុរសជាប្ដីមានឈ្មោះសានីត ដកម៉ៃ វ័យ៤១ឆ្នាំ ដែលបានសម្លាប់ប្រពន្ធនិងកូនប្រុសៗរបស់ពួកគេទាំង២នាក់។ ឃាតករដែលជាប្ដីក៏បានព្យាយាមធ្វើអត្តឃាត តែមិនបានជោគជ័យឡើយ និងកំពុងតែសម្រាកព្យាបាលនៅឯមន្ទីរពេទ្យ។

យោងតាមប៉ូលីសថៃ  កាលដើមឡើយ ជនបង្កគឺជាអ្នកធានាកម្ចីរបស់មិត្តគាត់ម្នាក់ចំនួន ៤០ម៉ឺនបាត ឬស្មើប្រមាណ១១៤០០ដុល្លារ។ ក្រោយមក មិត្តរបស់គាត់ក៏បានរត់គេចខ្លួន ហើយដែលធ្វើលោកសានីត ត្រូវរ៉ាប់រងសងបំណុលមួយនេះ។ ដោយចង់ជួយសម្រាលបំណុលរបស់ប្ដី អ្នកស្រីវីផាផន រ៉ាឆា​ដែលជាភរិយាបានទៅស្វែងរកកម្ចីអនឡាញ​ រួចបានចាញ់អស់ប្រាក់ប្រមាណ១លាន៧សែនបាត ឬស្មើនឹងប្រមាណ៤៨០០០ដុល្លារថែមទៀត។ នៅចំពោះមុខនៃបំណុលវ័ន្តករនេះ ទើបជំរុញឲ្យមានឃាតកម្មសម្លាប់គ្រួសារ​នេះកើតឡើង ដែលអង្រួនឲ្យមានការចាប់អារម្មណ៍ពីសាធារណជន ស្ដីពីឥទ្ធិពលដ៏គួរឲ្យបារម្ភនៃអំពើឆបោកតាមប្រព័ន្ធអនឡាញ។ដោយឡែក មេក្លោងឆបោកជនជាតិចិន ដែលអាជ្ញាធរខ្មែរនិងថៃតាមចាប់នេះ គឺជាជនសង្ស័យដឹកនាំ មនុស្សយ៉ាងតិច១១នាក់ មានជនជាតិថៃចំនួន៩នាក់ ជនជាតិខ្មែរ២នាក់ រួមសហការឆបោកប្រាក់ ពីជនរងគ្រោះដែលជាប្រពន្ធនេះ។

គួរជម្រាបថា ក្នុងឆ្នាំ២០២២ ប៉ូលីសថៃថា ខ្លួនបានទទួលសេចក្ដីរាយការណ៍ ពីករណីចាញ់បោកប្រាក់តាមប្រព័ន្ធអនឡាញសរុបជាង២០ម៉ឺនករណី ស្មើនឹងទឹកប្រាក់ប្រមាណ៣០ពាន់លានបាត ឬ៨៥៥លានដុល្លារ។ អំពើឆបោកតាមប្រព័ន្ធអនឡាញ គឺជាបញ្ហាធំមួយ ដែលកំពុងរីកឡើងក្នុងតំបន់អាស៊ីអាគ្នេយ៍ ដោយបើយោងតាមរបាយការណ៍របស់អង្គការសហប្រជាជាតិ មនុស្សយ៉ាងតិច១២ម៉ឺននាក់ ក្នុងប្រទេសភូមា អាចត្រូវបានគេបង្ខំឲ្យធ្វើការឆបោក ខណៈទន្ទឹមគ្នានេះ មនុស្សប្រមាណ១០ម៉ឺននាក់ អាចត្រូវបានគេធ្វើការឆបោកដោយបង្ខំដូចគ្នា ក្នុងប្រទេសកម្ពុជា។ ដោយឡែក ប្រទេសផ្សេងៗទៀតនៅក្នុងតំបន់ ដូចជា ឡាវ ហ្វីលីពីន និងថៃ ជារឿយៗក៏ត្រូវបានគេកំណត់ជាទិសដៅដែលជនល្មើសប្រើសម្រាប់ធ្វើការឆបោក ឬជាច្រកចេញចូលផងដែរ៕